Літва следам за Польшчай плануе замініраваць мяжу з Беларуссю і Расіяй
Міністарка нацыянальнай абароны Літвы Давіле Шакалене паведаміла, што яны з міністрамі абароны Польшчы і Фінляндыі абмеркавалі аб'яднанне польскага «Усходняга шчыта» і Балтыйскай лініі абароны, а таксама ўдзел Фінляндыі ў фарміраванні адзінага плана ўзмацнення аховы мяжы.
Давіле Шакалене. Фота: AP Photo/Mindaugas Kulbis
«Падчас гэтых сустрэч была распачатая дыскусія пра абнаўленне і пашырэнне канцэпцыі контрмабільнасці. Па польскім прыкладзе, мяжа паўночна-ўсходняга флангу можа быць умацаваная некалькімі радамі фартыфікацыйных збудаванняў, якія будуць уключаць, але не абмяжоўвацца супрацьпяхотнымі і супрацьтанкавымі мінамі. Партнёры маюць намер атрымаць фінансаванне ЕС для гэтай мэты», — сказала Шакалене.
Яна нагадала, што Літва першай у рэгіёне ініцыявала дыскусіі пра выхад з Атаўскай канвенцыі аб супрацьпяхотных мінах, гэтае рашэнне падтрымалі Эстонія, Латвія і Польшча.
Пра намер краін Балтыі і Польшчы выйсці з Атаўскай канвенцыі было заяўлена 18 сакавіка:
«Супольная рэгіянальная пастанова пасылае выразны сігнал: дзяржавы, якія маюць агульную мяжу з Расіяй, гатовыя прыняць усе магчымыя захады для гарантавання бяспекі сваіх грамадзян», — заявіла тады Давіле Шакалене.
Выхад з Атаўскай дамовы, да якой далучылася больш за 160 дзяржаў, дазволіць Польшчы і краінам Балтыі стварыць запас супрацьпяхотных мін. Сярод 36 краін, якія не падпісвалі Атаўскую канвенцыю ўвогуле — Расія, ЗША і Кітай.
Чытайце таксама:
У Мінабароны Польшчы не выключылі мініравання мяжы з Беларуссю
Расія не мае шанцаў у сутыкненні з Еўропай. Але з дзвюма ўмовамі