«Я схапіў яе за сцёгны, каб не паслізнуцца». У Парыжы ідзе судовы працэс над Жэрарам Дэпард'ё па абвінавачванні ў сэксуальным гвалце
Славутаму акцёру пагражае да пяці гадоў турмы.
Жэрар Дэпард'ё. Фота: Tristar Media / Getty Images
У Парыжы працягваецца судовы працэс супраць французскай кіназоркі Жэрара Дэпард'ё, які пачаўся ў панядзелак. Актору выстаўлена абвінавачанне ў сексуальным гвалце супраць дзвюх жанчын падчас здымак фільма «Зялёныя стаўні» ў 2021 годзе, піша Бі-бі-сі.
Працэс, як чакаецца, працягнецца прынамсі тры дні. Першапачаткова ён мусіў адбыцца яшчэ ў кастрычніку, але быў перанесены з-за дрэннага самаадчування Дэпард'ё.
Гэта першая справа супраць Дэпард'ё, што дайшла да суда, хаця ўсяго каля 20 жанчын абвінавацілі яго ў непрыстойных паводзінах. Калі яго прызнаюць вінаватым, яму пагражае да пяці гадоў зняволення і штраф памерам да 81 тысячы долараў.
У аўторак пацярпелая — мастачка-пастаноўшчыца Амэлі К., якая выступала ў судзе пасля Дэпард'ё, — заявіла, што акцёр дакранаўся да яе цела, заціснуўшы яе паміж сваіх ног падчас здымак фільма. Пры гэтым ён рабіў адкрыта сэксуальныя заўвагі.
Сам Дэпард'ё адмаўляе, што гэта было гвалтам, і сцвярджае, што ўсе грубыя каментары, якія ён выказваў, былі выкліканыя кепскім настроем.
«Я схапіў яе за сцёгны, каб не паслізнуцца, бо быў засмучаны: з-за яе, з-за спёкі, гэта была пятніца, канец здымачнага тыдня, я вельмі стаміўся», — заявіў Дэпард'ё.
«Я не разумею, навошта мне лапаць жанчыну», — сказаў ён у судзе і дадаў, што на той момант быў у такой ступені залішне важкі, што некаторыя дзеянні, у якіх яго абвінавачваюць — напрыклад, заціснуць Амэлі К. паміж ног, — былі б проста фізічна немагчымымі.
76-гадовая зорка французскага кіно ў апошнія гады сутыкаецца з усё большай колькасцю абвінавачанняў у сексуальным гвалце.
Судовы працэс над ім раскалоў французскую акцёрскую супольнасць. Частка калегаў выступіла ў яго падтрымку і, як чакаецца, дасць паказанні на працэсе, іншыя ж — на баку пацярпелых.
У панядзелак каля будынка парыжскага суда сабраліся некалькі дзясяткаў пратэстоўцаў. Шмат хто трымаў плакаты ў падтрымку ахвяраў сэксуальнага гвалту і скандаваў фемінісцкія лозунгі.
Дэпард'ё паслядоўна адмаўляў усе абвінавачванні — у тым ліку і ў адкрытым лісце, апублікаваным у французскай газеце Le Figaro ў 2023 годзе.
«Прычыніць шкоду жанчыне — гэта тое ж самае, што ўдарыць маю маці ў жывот», — напісаў тады акцёр.