У Жлобінскім раёне ў пенсіянера знайшлі боепрыпасы, дазвол на захоўванне якіх скончыўся паўстагоддзя таму
У канцы сакавіка суд Жлобінскага раёна разгледзеў крымінальную справу па абвінавачванні 81-гадовага вяскоўца. Як паведамляе мясцовая раёнка «Новы дзень», у пажылога мужчыны знайшлі порах і патроны да гладкаствольнай паляўнічай зброі, а таксама некалькі патронаў да малакалібернай вінтоўкі.
Фота ілюстрацыйнае
У ходзе расследавання было ўстаноўлена, што ў 1967 годзе падазраваны аформіў паляўнічы білет і набыў двуствольную гладкаствольную паляўнічую стрэльбу для заняткаў паляваннем. Тэрмін дзеяння паляўнічага білета і дазвол на захоўванне зброі і боепрыпасаў скончыўся ў 1976 годзе і пасля таго не абнаўляўся.
На судовым пасяджэнні мужчына цалкам прызнаў сваю віну. Суд прызнаў вяскоўца вінаватым у незаконным набыцці і захоўванні боепрыпасаў і выбуховых рэчываў, што падпадае пад ч. 2 арт. 295 КК Рэспублікі Беларусь.
Пенсіянеру было прызначана пакаранне ў выглядзе штрафу ў памеры 40 базавых велічынь.
Чытайце таксама:
Беларус надрукаваў на 3D-прынтары пісталет-кулямёт
У Бабруйскай крэпасці падчас рэстаўрацыі знайшлі тысячы старых патронаў
Салігорцы рамантавалі дах і знайшлі спраўны «парабелум», які схавалі 60 гадоў таму