У жыхара Краснапольскага раёна дома знайшлі рэдкую бельгійскую стрэльбу XIX стагоддзя
Паляўнічы расказаў, што зброю атрымаў у спадчыну. Але ад крымінальнай справы гэта яго не ўратавала.
Фота: Дзяржаўны камітэт судовых экспертыз
У Краснапольскім раёне сілавікі правялі ператрус у мясцовага паляўнічага. Як высветлілася, акрамя зарэгістраванай паляўнічай стрэльбы мужчына захоўваў яшчэ два віды зброі.
У паляўнічага знайшлі вінтажную стрэльбу і заржавелы пісталет, непрыдатны для стральбы. Па выніках экспертызы высветлілася, што мужчына захоўваў дома рэдкую бельгійскую стрэльбу G. Kopplin Zulltchau.
Яе ў другой палове XIX стагоддзя вырабіў бельгійскі майстар. Верагодна, на заказ, і такіх стрэльбаў было выпушчана вельмі мала. Як адзначылі ў камітэце судовых экспертыз, падобны экзэмпляр G. Kopplin Zulltchau выстаўлены ў Дзяржаўным гістарычным музеі ў Маскве. Пісталет аказаўся французскім Mod. 1935A, яго вырабілі ў XX стагоддзі.
Паляўнічы патлумачыў, што пісталет адкапаў на агародзе, а стрэльба дасталася яму ад бацькі, які прывёз зброю з Германіі. На вяскоўца завялі крымінальную справу.
Чытайце таксама:
Салігорцы рамантавалі дах і знайшлі спраўны «парабелум», які схавалі 60 гадоў таму
Вясковец стрэліў сабе ў галаву, праспаў палову сутак — і выжыў