У Беларусь прыехала дэлегацыя «Яндэкса». Хочуць запусціць у нас беспілотнае таксі
17 красавіка ў беларускім урадзе прайшла сустрэча з топ-менеджментам «Яндэкса». Пра гэта паведаміў devby.io са спасылкай на прэс-службу ўрада.
Перамовы вёў прэм’ер-міністр Аляксандр Турчын. «Для мяне «Яндэкс» — гэта ў меншай ступені таксі», — падкрэсліў прэм’ер, акцэнтуючы ўвагу на магчымасцях расійскай кампаніі ў сферы ШІ.
Ён і дарадца па карпаратыўным развіцці «Яндэкса» Аляксей Кудрын абмеркавалі перспектывы прымянення ў Беларусі перадавых ШІ-тэхналогій кампаніі.
Ключавыя ініцыятывы:
- запуск беспілотнага транспарту паміж гарадамі-спадарожнікамі;
- укараненне робата-таксі ў Мінску;
- паслуга па арэндзе аўтамабіля, абсталяванага прыладай максімальнага кантролю стану кіроўцы, для тых, хто хоча атрымаць дадатковы заробак у таксі.
«Мы можам рабіць больш у інтарэсах Беларусі і Расіі», — адзначыў Кудрын.