«Мы не кітайцы, мы тайцы». У Тайландзе звольнілі супрацоўніка нацпарка пасля канфлікту з расіянамі, якія павіталі яго па-кітайску «ні хаа»
Наглядчыка нацыянальнага парку ў Тайландзе звольнілі пасля таго, як у яго адбыўся канфлікт з расійскімі турыстамі. Яны павіталі яго на кітайскай мове, сказаўшы: «ні хаа». Відэа з іх дыялогам стала вірусным у інтэрнэце.
Інцыдэнт, які імгненна разляцеўся ў сацсетках і набраў мільёны праглядаў, выклікаў шырокі рэзананс у грамадстве і прывёў да звальнення супрацоўніка.
26-гадовы супрацоўнік нацыянальнага парка Сірануд Скот, які выконваў свае абавязкі на пляжы на поўдні краіны, счапіўся з расійскай парай. Прычынай стала іх прывітанне — «ні хаа», традыцыйнае кітайскае вітанне, якое яны выкарысталі, відаць, не ўбачыўшы розніцы паміж тайцамі і кітайцамі.
Аднак для Скота гэта стала асабістай абразай.
«Мы не кітайцы, мы тайцы. Гэта няветліва і зневажальна», — заявіў ён, дадаўшы, што, калі такое паўторыцца, ён даможацца дэпартацыі турыстаў з краіны.
Расіянін тлумачыў, што не з'яўляецца расістам, але Скот настойваў на сваім, называючы паводзіны турыстаў непаважлівымі.
Відэа сабрала мільёны праглядаў і выклікала гарачыя спрэчкі. Частка тайцаў выказалася ў падтрымку супрацоўніка, адзначаючы, што яны таксама часта сутыкаюцца з тым, што іх прымаюць за кітайцаў.
«Турызм не дае людзям права паводзіць сябе безадказна ці грэбліва да мясцовага насельніцтва», — напісала адна з карыстальніц.
Аднак іншыя палічылі, што рэакцыя Скота была празмернай і толькі шкодзіць іміджу Таіланда як гасціннай краіны.
«Можна было проста паправіць людзей з усмешкай, а не пагражаць дэпартацыяй», — адзначыў адзін з каментатараў.
Кіраўніцтва ж нацыянальнага парка вырашыла звольніць Сірануда Скота. У заяве адзначаецца, што яго паводзіны не адпавядалі стандартам службы і могуць нанесці шкоду іміджу краіны.