Будзе амністыя да 80-годдзя Перамогі
Яна закране каля 8 тысяч асуджаных. Абяцаюць, што амністыя будзе датычыць новай катэгорыі асуджаных — з пэўным захворваннем.
Па даручэнні Лукашэнкі ўрадам унесены ў парламент законапраект «Аб амністыі ў сувязі з 80-годдзем Перамогі ў Вялікай Айчыннай вайне».
У законапраекце захаваны падыходы мінулых гадоў, але прадугледжаны і шэраг навацый, паведамляе прэс-служба Лукашэнкі.
Пералік асоб, якія цалкам вызваляюцца ад пакарання і іншых мер крымінальнай адказнасці, дапоўнены новай катэгорыяй асоб з пэўнымі захворваннямі. Але што гэта за катэгорыя, невядома.
Таксама прапануецца раней не судзімым асобам, якія дасягнулі 70-гадовага ўзросту і асуджаным да пазбаўлення волі на тэрмін да шасці гадоў уключна, замяніць пакаранне больш мяккім у выглядзе абмежавання волі без накіравання ў папраўчую ўстанову адкрытага тыпу.
Таксама будзе прымяняцца частковая амністыя ў выглядзе скарачэння пакарання на адзін год да асоб, асуджаных за неасцярожныя злачынствы, якія прывялі да смерці чалавека.
Асноўнымі ўмовамі для прымянення амністыі з'яўляюцца поўнае пакрыццё шкоды, а таксама станоўчая характарыстыка асобы ў перыяд адбыцця пакарання.
Паводле папярэдніх разлікаў, пад амністыю трапяць амаль 8 тысяч асуджаных.
За апошнія пяць гадоў у Беларусі былі абвешчаныя чатыры амністыі. Палітвязняў яны не тычыліся.