Восем чалавек арыштавалі ў Вялікабрытаніі за падрыхтоўку тэрактаў
У Вялікабрытаніі затрымалі васьмярых мужчын у выніку дзвюх асобных антытэрарыстычных аперацый. Большасць затрыманых — грамадзяне Ірана. Паводле паліцыі, аперацыі не звязаныя паміж сабой, але маюць сур'ёзны характар і сведчаць пра працяглую пагрозу нацыянальнай бяспецы.
Паліцыя ў Лондане. Фота: Nick Potts / PA Images via Getty Images
Першая аперацыя адбылася ў суботу і праходзіла на тэрыторыі розных рэгіёнаў Англіі — у Свіндане, заходнім Лондане, Стокпарце, Рочдэйле і Манчэстары. У выніку былі арыштаваныя пяць мужчын, чацвёра з якіх — грамадзяне Ірана: дваім па 29 гадоў, аднаму — 40, і яшчэ аднаму — 46. Асобу і грамадзянства пятага арыштаванага не ўдакладняюць.
У той жа дзень, у рамках асобнага антытэрарыстычнага расследавання, у Лондане былі арыштаваныя яшчэ трое мужчын, ва ўзросце 39, 44 і 55 гадоў. Усе яны — грамадзяне Ірана.
Паліцыя падкрэсліла, што гэтая аперацыя не звязаная з затрыманнем першых пяці асоб.
Цяпер следчыя спрабуюць высветліць, ці ёсць іншыя пагрозы для грамадскасці.