Іпэшнік у Мінску пісаў ананімкі на канкурэнтаў, у тым ліку і палітычныя. Зафіксавана 18 эпізодаў
Некалькі даносаў перавозчык напісаў і на кліентаў.
Фота: УДАІ ГУУС Мінгарвыканкама
41-гадовы індывідуальны прадпрымальнік пісаў ілжывыя даносы на канкурэнтаў. За гэта на яго завялі крымінальную справу, паведамілі ў Генпракуратуры.
Мужчына займаўся міжнароднымі аўтобуснымі пасажырскімі перавозкамі ў Еўрасаюз. Каб абысці канкурэнтаў і займець больш кліентаў, ён вырашыў пісаць даносы на іншыя фірмы.
Так, з сакавіка 2023 года па люты 2024-га ён слаў у адпаведныя органы і іншыя дзяржаўныя ўстановы Беларусі ананімкі. Там іпэшнік абвінавачваў перавозчыкаў-канкурэнтаў у розных злачынствах, у тым ліку цяжкіх і асабліва цяжкіх.
Напрыклад, паведамляў пра нібыта перавозку праз мяжу наркотыкаў, агнястрэльнай зброі, пра карупцыю і «экстрэмізм».
Больш за тое, некалькі ілжывых ананімак ён напісаў і на сваіх кліентаў, каб адпомсціць за былыя канфлікты.
Усяго мінчуку інкрымінуюць 18 эпізодаў злачыннай дзейнасці.