Міністр Трампа згодзен, што Пуцін — ваенны злачынца, але размовы з ім патрэбныя
«Я лічу, што пасля Другой сусветнай вайны былі неабходныя перамовы з Японіяй», — лічыць Скот Бесэнт.
Фота: Mikhail Metzel, Sputnik, Kremlin Pool Photo via AP
Міністр фінансаў ЗША Скот Бесэнт пагадзіўся, калі 7 мая яго спыталі, ці лічыць ён лідара Расіі Уладзіміра Пуціна ваенным злачынцам. Пра гэта паведамляе Kyiv Independent.
На пытанне кангрэсмена-дэмакрата Хуана Варгаса «Ці лічыце вы Уладзіміра Пуціна ваенным злачынцам?», Бесэнт адказаў: «Так».
Гэтыя каментары прагучалі падчас выступлення Бесэнта ў Кангрэсе ЗША і штогадовай дачы паказанняў перад Камітэтам па фінансавых паслугах Палаты прадстаўнікоў ЗША.
На пытанне Варгаса: «Вы б вялі перамовы з ваенным злачынцам?», Бесэнт адказаў: «Я лічу, што гэта сутнасць дыпламатыі — трэба весці перамовы з абодвума бакамі».
«Я лічу, што пасля Другой сусветнай вайны былі неабходныя перамовы з Японіяй», — дадаў Бесэнт.
Бесэнт раней крытычна выказваўся адносна ўкраінскага кіраўніцтва, у прыватнасці прэзідэнта Уладзіміра Зяленскага. 1 мая Бесэнт прапанаваў перазапусціць адносіны паміж Украінай і ЗША пасля падпісання 30 красавіка двухбаковага пагаднення пра мінералы.