У Беларусі плануюць запусціць грамадскі транспарт у вёскі па выкліку пасажыра
Сёлета пілотны праект будзе рэалізаваны ў адным з раёнаў.
Начальнік упраўлення аўтамабільнага і гарадскога пасажырскага транспарту Мінтранса Андрэй Гладкі расказаў, што прапрацоўваецца пытанне забеспячэння транспартам населеных пунктаў з нязначным пасажырапатокам, піша blizko.by.
— Сацыяльны стандарт прадугледжваецца ў тым ліку і для населеных пунктаў з колькасцю насельніцтва ад 20 чалавек. Часта пусціць туды аўтобус немагчыма ў прынцыпе — не дазваляюць параметры дарогі. Для гэтага ўводзіцца такая ацэнка, як зона ахопу транспартным абслугоўваннем, каб да пэўнага прыпынку можна было арганізаваць злучэнне або пабудаваць прыпынак і ўжо адтуль пусціць аўтобусы.
Ужо ў 2025 годзе ў адным з раёнаў краіны мы плануем рэалізаваць пілотны праект, які прадугледжвае магчымасць арганізацыі перавозкі або замовы транспартнага сродку ў зручны для пасажыра час — напрыклад, па званку або з выкарыстаннем мабільнага дадатку.