У Фінляндыі плануюць забараніць беларусам купляць нерухомасць

Як паведамляе фінскае выданне Yle, Міністэрства абароны Фінляндыі выступіла з ініцыятывай забароны здзяйсняць здзелкі з нерухомасцю для грамадзян Беларусі.

Сталіца Фінляндыі Хельсінкі. Фота: Wikimedia Commons

Такое рашэнне стала магчымым пасля таго, як парламент краіны прыняў закон, які дазваляе Міністэрству абароны блакаваць куплю-продаж нерухомасці асобамі або арганізацыямі з краін, што вядуць агрэсіўную вайну ці ўяўляюць пагрозу бяспецы Фінляндыі.

У ведамстве падкрэслілі, што, паводле рашэнняў Рады ЕС і інфармацыі фінскіх уладаў, пад гэтыя крытэрыі падпадаюць як Расія, так і Беларусь.

Заявы ад грамадзян Расіі і Беларусі, пададзеныя да таго, як пастанова ўступіць у сілу, будуць разглядацца па агульных правілах.

Праект дакумента апублікаваны сёння, 23 мая, для грамадскага абмеркавання. Каментары прымаюцца да 9 чэрвеня, а канчатковае рашэнне мяркуецца прыняць у чэрвені.

Раней, яшчэ да змены закона, Міністэрства абароны магло забараніць продаж нерухомасці расіянам, калі гэта ўяўляла пагрозу нацыянальнай бяспецы, але толькі ў кожным асобным выпадку.

Каментары да артыкула