14-гадовы хлопчык ледзь не перавёў махлярам грошы бацькоў
Школьніку ў месенджары паступіў званок ад невядомага, які прадставіўся супрацоўнікам органаў.
Той мужчына заявіў, што на імя падлетка махляры аформілі крэдыты, таму ў дачыненні да яго будзе распачата крымінальная справа. А каб гэтага пазбегнуць, неабходна задэклараваць зберажэнні бацькоў, паведамляе тэлеграм-канал «Міліцыя Мінска».
Выконваючы інструкцыі, хлопчык знайшоў дома 900 даляраў, пасля чаго накіраваўся ў банк, каб абмяняць валюту і перавесці грошы на рахунак, указаны махлярамі.
Аднак супрацоўнікі банка праявілі пільнасць, западозрылі нешта нядобрае і адмовіліся праводзіць аперацыю. Вярнуўшыся дадому, падлетак расказаў бацькам, а тыя звярнуліся ў міліцыю.