У мінскім кафэ заказы развозіць робат-афіцыянт
У кафэ ў мінскім мікрараёне Паўднёвы Захад на працу прынялі афіцыянта нестандартнага знешняга выгляду.
Не, яго адрознівае не яскравая прычоска або правакацыйны стыль адзення. Сярод іншых афіцыянтаў яго вылучае прыкладна ўсё: Олі — робат, піша Onliner.by.
Знайшоў сабе працу Олі ў кафэ «Адэса-мама» ў ГЦ «Тытан». Фірменнаму марскому стылю давялося адпавядаць: пафарбаваны робат у бела-сінія колеры. А яшчэ ў Олі велізарныя вочы, у якіх размешчаны камеры. Яны вызначаюць перашкоды на шляху і размяшчэнне сталоў. Прымаць рашэнні дапамагае штучны інтэлект.
Олі можа прывезці меню, даставіць стравы з кухні і забраць посуд — паставіць яго на стойку давядзецца самастойна. Для гэтага ўнутры ў робата ёсць тры паліцы для талерак. Кожная паліца можа вытрымаць да 10 кілаграмаў. Паводзіць сябе робат стрымана, таварыскасцю не вылучаецца, але затое і на чаявыя не разлічвае.
Узялі на працу Олі на поўную стаўку. Але калі ён не будзе спраўляцца — на дапамогу прыйдуць звычайныя афіцыянты.
«Мы не ставілі перад сабой мэту зэканоміць на афіцыянтах. Нам куды важней стварыць людзям добры настрой. Тым больш што робат яшчэ вучыцца і ўдасканальвае свае навыкі. Але прагрэс не спыніць, інавацыі атрымліваюць распаўсюджанне і ў грамадскім харчаванні», — адзначылі ў ГЦ «Тытан».
Гэта не першы робат, які атрымаў працу ў Мінску. Два гады таму расказвалася пра робата-ката, які абслугоўваў наведвальнікаў у рэстаране «Хінкальня» ў Лошыцы.