На ўзбярэжжа Турцыі выкінула дрон, падобны да ўкраінскага

На турэцкім узбярэжжы знайшлі беспілотнік, які, паводле мясцовых СМІ, нагадвае ўкраінскі дрон-камікадзэ, піша «Украінская праўда».

Фота: IHA

Інцыдэнт адбыўся 11 чэрвеня каля 12:30 на пляжы Узункум у раёне Шыле пад Стамбулам. Людзі заўважылі каля мора падазроны аб’ект, знешне падобны да дрона-камікадзэ, і паведамілі пра гэта берагавой ахове.

На месца прыехалі выратавальнікі, а пазней сапёры Вайскова-марскіх сіл Турцыі. Паводле мясцовага выдання Yeni Şafak, аб’ект выглядае як дрон украінскай вытворчасці, а яго ніжняя частка мае прыкметы выбуховага механізму.

Паходжанне дрона пакуль дакладна не ўстаноўлена, яго перадалі на экспертызу. Гэта не першы выпадак, калі з пачатку поўнамаштабнага ўварвання Расіі ва Украіну каля турэцкіх берагоў знаходзяць выбуховыя прылады.

Каментары да артыкула