У Слоніме злавілі злодзеяў у масках Якубовіча. Яны залезлі ў дом і падмянілі грошы на сувенірныя
Пара рабаўнікоў прадумала план да дробязяў, але папалася амаль адразу.
Фота: СК
Двое мужчын прыехалі ў Слонім з Баранавічаў. Яны пакінулі машыну ў лесе, пераселі на ровары і пачалі прыглядаць дом, які можна было б абчысціць.
У новым мікрараёне на ўскраіне горада іх увагу прыцягнуў участак з дагледжаным домам і гаражом. Яны пачалі сачыць за жыхарамі і раніцай 16 чэрвеня, калі тыя пакінулі дом, адзін з рабаўнікоў вярнуўся да аўтамабіля, а другі пралез усярэдзіну.
34-гадовы мужчына хутка знайшоў у спальні ашчаджэнні ў рознай валюце і ювелірныя ўпрыгожванні. Грошы ён падмяніў на сувенірныя купюры, каб выйграць час. З дома злодзей вынес 20 тысяч рублёў і 11 упрыгожванняў на суму ў 8 тысяч. Сябры селі ў машыну і паехалі ў Баранавічы.
Гаспадыня вярнулася дадому да абеду і адразу пабачыла прапажу грошай. Яна патэлефанавала ў міліцыю, пасля чаго сілавікі затрымалі злодзеяў па дарозе ў Баранавічы, піша СК.
Усё скрадзенае знайшлі ў машыне ў затрыманых. Акрамя таго, у аўто знайшлі ровары, мабільныя тэлефоны, маскі з тварам расійскага вядучага Леаніда Якубовіча, шалік, пальчаткі, біноклі, радыёстанцыі, стамескі, лом, нож, электрашокер і перцавыя балончыкі. Увогуле, злодзеі рыхтаваліся да налёту дбайна.
Як аказалася, абодва мужчыны прыцягваліся да крымінальнай адказнасці: 34-гадовы жыхар Лунінецкага раёна двойчы судзімы за крадзяжы, у тым ліку ў асабліва буйным памеры, ягоны 40-гадовы прыяцель з Баранавічаў — за крадзеж у інтэрнэце.
На мужчын завялі крымінальную справу аб крадзяжы ў буйных памерах.