У Рэчыцкім раёне адбыўся крадзеж па сюжэце вядомай дзіцячай казкі
«Хто еў маёй лыжкай?» Такое пытанне задала супрацоўнікам Следчага камітэта гаспадыня аднаго з лецішчаў у вёсцы Ліскі.
Фота: Allegro.pl
У студзені жанчына наведалася на лецішча і выявіла, што ў яе адсутнасць (з лістапада мінулага года) яно не пуставала. Амаль як у казцы «Тры мядзведзі» хтосьці забраўся ў дом: зламаў замок на дзвярах, адціснуў уваходныя дзверы і «наклаў лапу» на чужую маёмасць. У выніку зніклі адзенне, абутак і прадукты, паведамляе Дзяржкамітэт судовых экспертыз.
Падчас агляду месца здарэння следчыя канфіскавалі лыжку і відэлец, якімі зламыснік карыстаўся падчас сваіх візітаў.
Сталовыя прыборы накіравалі для правядзення судовай медыцынскай генетычнай экспертызы. На лыжцы эксперты ўстанавілі наяўнасць біялагічнага матэрыялу, які належыць мужчыну.
У маі ва ўпраўленне Дзяржаўнага камітэта судовых экспертыз па Гомельскай вобласці на даследаванне падалі ўзоры букальнага эпітэлія падазраванага.
У далейшым пры правядзенні генетычнай экспертызы эксперты ўстанавілі тоеснасць генатыпу падазраванага з генетычнымі характарыстыкамі біялагічнага матэрыялу на лыжцы, канфіскаванай з месца злачынства.