У Екацярынбургу паказальна жорстка затрымалі кіраўніка мясцовай азербайджанскай дыяспары ВІДЭА

У Екацярынбургу паказальна жорстка затрымалі кіраўніка азербайджанскай дыяспары на Урале бізнэсмена Шахіна Шыхлінскага. Разам з Шыхлінскім быў затрыманы ягоны сын, якога пазней адпусцілі. Пры затрыманні сілавікі разбілі акно машыны бізнэсмена.

Скрыншот з відэа

Якія фармальныя прэтэнзіі ёсць да Шыхлінскага, пакуль незразумела.

Прыкладна ў гэты ж самы час у Варонежы сілавікі прыйшлі да яшчэ аднаго ўплывовага выхадца з Азербайджана, бізнэсмена Юсіфа Халілава, якога называюць саўладальнікам найбуйнейшага ў рэгіёне Аляксееўскага рынку і «сматрачым» ад дыяспары па вобласці.

Гэтыя дзеянні — чарговыя крокі ў расійска-азербайджанскім міждзяржаўным канфлікце, які ідзе апошнія тры дні.

Пачалося ўсё з таго, што ў Екацярынбургу 27 чэрвеня затрымалі больш за 50 чалавек, пераважна азербайджанцаў, па справе аб забойстве бізнэсмена Юніса Пашаева ў 2001 годзе. Падчас затрымання загінулі браты Сафаравы, афіцыйна ад сардэчнай недастатковасці, але сваякі сцвярджаюць, што іх забілі і катавалі. Азербайджанская пракуратура і СМІ заявілі пра гвалт і заклікалі Расію расследаваць здарэнні.

Азербайджан выказаў рашучы пратэст: адмененыя ўсе расійскія культурныя мерапрыемствы, дэпутаты не паехалі на сумеснае пасяджэнне з Расіяй, а таксама адбыліся затрыманні ў азербайджанскім філіяле расійскага «Спутніка». Сёння ж азербайджанскія СМІ паведамілі пра затрыманне ў Баку членаў дзвюх АЗГ, што складаліся з расіян.

Каментары да артыкула