Крутога айцішніка, які вярнуўся з Грузіі, асудзілі па чатырох палітычных артыкулах
У Андрэя Бераставога больш за 20 гадоў досведу працы ў дызайне, а апошнія 15 ён працуе ў IT. У другой палове 2024-га яго затрымалі — падобна, прычына ў каментарах у тэлеграме.
Андрэй Бераставы. Фота з ягонага Linkedin
Андрэю Бераставому 44 гады. Ён гамяльчук. У 1999-м скончыў Гомельскі машынабудаўнічы каледж.
З канца 2002 года ён працуе ў IT і займаецца дызайнам. Пачынаў як графічны дызайнер у беларускіх студыях Artlex і Kashan. Там ён ствараў дызайн упакоўкі, прамацыйных прадуктаў, дызайн сайтаў і гэтак далей.
Апошнія 15 гадоў ён займаўся UX/UI-дызайнам — стварэннем зручных для карыстальніка інтэрфейсаў і візуальнага афармлення для праграм і вэб-прадуктаў. Ён працаваў у міжнароднай ІТ-кампаніі Add-in Express/Ablebits, дзе прайшоў шлях ад дызайнера да кіраўніка дызайн-каманды. З сакавіка 2023-га перайшоў на працу як вядучы UX/UI дызайнер у грузінскі офіс кампаніі. Вядома, што перыядычна ездзіў у Беларусь.
Андрэй Бераставы. Фота з ягонага фэйсбука
У кампаніі Ablebits Андрэй Бераставы працаваў над дызайнам розных прадуктаў, у тым ліку над мабільнай праграмай Meds and Pill Reminder, якая дапамагае не забываць пра лекі.
У Бераставога шмат хобі. Напрыклад, ён рабіў сайт рускамоўнай супольнасці карыстальнікаў навігатара Waze — waze.su. Таксама вырошчваў ягады і рабіў пра гэта рэсурс, дзе распавядаў, як правільна іх даглядаць.
Апошні раз Андрэй нешта каментаваў у тэлеграме ў жніўні 2024 года. Імаверна, яго затрымалі напрыканцы жніўня або ў пачатку верасня 2024-га — ён акурат пісаў, што едзе ў Беларусь.
Скрыншот з сайта Бераставога, дзе ён вучыў вырошчваць ягады
Мужчыну асудзілі ў 2025 годзе па чатырох артыкулах — «заклікі да прычынення шкоды Беларусі» (ч.3 арт. 361 КК), «паклёп на Лукашэнку» (ч.2 арт. 367 КК), «фінансаванне экстрэмісцкай дзейнасці» (ч.1 і ч.2 арт. 361-2 КК) і «ўдзел у дзеяннях, якія груба парушаюць грамадскі парадак» (ч.1 арт. 342 КК).
Зразумела толькі, што падставай маглі стаць каментары Бераставога ў тэлеграме. Ён карыстаўся старым акаўнтам, прывязаным да ягонага ўласнага беларускага нумару, і старым нікнэймам, які выкарыстоўваў паўсюль.
Бераставому пагражала да 12 гадоў калоніі. Сутнасць абвінавачанняў і дакладны прысуд невядомыя, але мужчына застаўся ў зняволенні.
Чытайце таксама:
Тлумачым, якім чынам сілавікі знаходзяць карыстальнікаў Telegram і як гэтага пазбегнуць
Распавядаем, як даказваюць удзел беларусаў у пратэстах і як зменшыць рызыку
Дасведчанаму айцішніку з EPAM прысудзілі калонію за данаты. Пагражала да васьмі гадоў