Ачышчаць магілёўскія могілкі ад завалаў паслалі ратавальнікаў з іншых рэгіёнаў

У Магілёўскую вобласць прыбылі каля 60 выратавальнікаў з іншых рэгіёнаў краіны, каб дапамагчы ў ліквідацыі наступстваў нядаўняга ўрагану. Пра гэта паведамілі ў МНС.

У ведамстве адзначылі, што горад працягвае аднаўляцца пасля моцнай буры, якая прайшла ў ноч на 10 ліпеня. Праз некалькі дзён пасля стыхіі рэгіён наведаў міністр па надзвычайных сітуацыях Вадзім Сіняўскі і прыняў рашэнне накіраваць дадатковыя сілы для паскарэння работ.

26 ліпеня ў Магілёў прыбылі тры зводныя атрады: 24 ратаўнікі з Віцебска, 25 — з Бабруйска, а таксама 10 супрацоўнікаў РАСП «Зубр». Яны ўжо пачалі выконваць работы.

Асноўная задача дадатковых сіл — расчыстка гарадскіх могілак ад паваленых дрэваў. Віцебскія і бабруйскія ратавальнікі працавалі на Грузаўскіх могілках, а байцы РАСП займаліся ліквідацыяй наступстваў на могілках па вуліцы Крупскай.

Каментары да артыкула