Драгічынская раёнка выпусціла кампліментарнае відэа пра ўпарадкаванне горада. У каментарах раскрылі і іншы бок

Драгічынская раёнка апублікавала ў тыктоку відэа, у якім жыхары і госці горада дзеляцца станоўчымі ўражаннямі пра ягонае ўпарадкаванне. Але ў каментарах людзі ставяцца да гэтага больш крытычна, заўважыла BG.Media.

Драгічын. Здымак ілюстрацыйны. Фота: drogichin.brest-region.gov.by 

У відэа людзі расказваюць, як змяніўся горад: адна пажылая жанчына кажа, што жыве тут амаль 40 гадоў і ўпершыню бачыць такія паляпшэнні — усё выкашана, цвітуць кветкі, ладзяцца мерапрыемствы, яна вельмі задаволеная. Малады чалавек дзякуе за чысціню і спакой увечары, а госця з Бярозы прызнаецца, што была прыемна здзіўленая: раней трава каля бальніцы не касілася, а цяпер там як у парку.

Аднак жа адна з апытаных усё ж адзначыла, што хоць цяпер у горадзе ўсё нібыта і прыгожа, але няма дзе прагуляцца — сонца свеціць, а ценю няма.

@drogichin.by Что думают жители и гости города Дрогичин о его благоустройстве? (ч.2) #благоустройство #опрос #дрогичин #рекомендации #дрогичинby #красота #брестскаяобласть #беларусь ♬ оригинальный звук - ДРОГИЧИН.by

У каментарах пад відэа людзі выказваліся значна крытычней: многія адзначылі, што дрэвы пазразалі і горад стаў «лысым», асабліва ў летнюю спёку няма дзе схавацца ад сонца. Некаторыя паскардзіліся на перапоўненыя сметнікі, смецце на вуліцах, а таксама на тое, што некаторыя часткі горада зусім не прыбіраюцца. Быў нават каментар, што «гэта не горад, а пустка».

Асабліва балюча жыхары ўспрынялі высяканне дрэў — адзін чалавек расказаў, што садзіў бярозы ў парку ў 1996 годзе і не разумее, навошта іх цяпер павысякалі.

Каментары да артыкула