У Брагінскім раёне сілавікі застрэлілі сабаку, які напаў на сваю гаспадыню
Міліцыя сцвярджае, што ў сабакі былі ўсе прыкметы шаленства.
Скрыншот відэа сілавікоў
Увечары 4 жніўня ў вёсцы Галкі Брагінскага раёна сабака напаў на сваю 81-гадовую гаспадыню. Як расказаў сын жанчыны, сабака атакаваў пенсіянерку, калі тая выйшла на двор. Сабака пакусаў жанчыне рукі і ногі, пенсіянерка паспела забегчы назад у дом.
Сабака працягваў паводзіць сябе агрэсіўна, таму гаспадары выклікалі міліцыю. Сілавікі сцвярджаюць, што ў сабакі былі ўсе прыкметы шаленства: пена з пашчы, неспакойныя і агрэсіўныя паводзіны, аблезлая поўсць.
У выніку міліцыянеры застрэлілі жывёлу з табельнай зброі. Пенсіянерка атрымала медыцынскую дапамогу і вярнулася дадому.