Гарэла знакамітая саборная мячэць у Кордаве: частка скляпенняў абрынулася
Адзін з найвыбітнейшых прыкладаў ісламскай архітэктуры ў Еўропе, ператвораны пасля Рэканкісты ў каталіцкі сабор, нягледзячы на разбурэнні і задымленне, адкрыўся на наступны дзень для тысяч турыстаў, якія хочуць пабачыць гэты ўнікальны помнік Сусветнай спадчыны ЮНЕСКА.
Пажар у Кордаўскай саборнай мячэці. Фота: сацсеткі, пажарная служба Кордавы
Пажар у Мескіце, былой саборнай мячэці Кордавы (Іспанія), пачаўся позна ўвечары пятніцы ў памяшканні паміж капліцамі Хрышчэння і Духа Святога, дзе захоўваліся ўборачны інвентар, у тым ліку электрычныя падмятальныя машыны.
Паводле папярэдняй версіі, прычынай мог стаць кароткае замыканне або перагрузка падчас зарадкі адной з машын. Агонь хутка распаўсюдзіўся ўверх, закрануўшы драўляныя канструкцыі даху і пашкодзіўшы некалькі капліц.
Пажар у Кордаўскім саборы, зняты відавочцамі.
Найбольш пацярпела капліца Дабравешчання, скляпенні якой абрынуліся ў выніку пажару. У гэтай капліцы XVIII стагоддзя знаходзіцца алтарны абраз працы Педра Марэна, скульптуры анёлаў, габелены з цыклу пра Аляксандра Македонскага і іншыя мастацкія каштоўнасці.
Паводле слоў дэкана сабора Хаакіна Альберта Ньевы, пашкоджаны ў асноўны верхняя частка рэтабла — прысценнага алтара — і асобныя элементы дэкору.
Капліца Дабравешчання на ўсходнім баку сабора да пажару. Фота: Wikimedia Commons
Капліца Дабравешчання пасля пажару. Фота: сацсеткі
Пацярпела таксама дах капліца Святога Мікалая з Бары, але гатычныя скляпенні вытрымалі, а капліца Духа Святога, адзін з найкаштоўнейшых рэнесансных помнікаў горада, закурана дымам.
Агулам пацярпела каля 50 квадратных метраў з 13 000 квадратных метраў, якія займае сабор. Значна больш сур’ёзных наступстваў удалося пазбегнуць дзякуючы аператыўным дзеянням пажарных і ўзгодненым захадам уладаў. Пажарная каманда здолела своечасова ізаляваць ачаг узгарання, не дапусціўшы распаўсюджання агню на іншыя часткі помніка.
Тушэнне пажару ўнутры сабора. Фота: пажарная служба Кордавы
Увосень у саборы плануюць усталяваць сучасную сістэму пажаратушэння з водным туманам, аналагічную той, што выкарыстоўваецца пасля пажару ў парыжскім Нотр-Даме.
Пасля першачарговых работ па расчыстцы ад дыму будзе падрыхтаваны праект рэстаўрацыі і кансервацыі, каб вярнуць пашкоджаным часткам гістарычны выгляд.
Аркады малельнай залы саборнай мячэці Кордавы. Фота: Wikimedia Commons
Саборная мячэць Кордавы — адзін з найвыбітнейшых помнікаў ісламскай архітэктуры ў Еўропе. Яго будаўніцтва пачалося ў 786 годзе пры эміры Абд ар-Рахмане I, а ў X стагоддзі халіф Аль-Мансур ажыццявіў апошнюю вялікую рэканструкцыю, дадаўшы восем нефаў. Пасля захопу горада каралём Фердынандам III у 1236 годзе мячэць была ператворана ў хрысціянскі сабор. За ўсю сваю больш чым тысячагадовую гісторыю будынак перажыў толькі два пажары да сённяшняга: у 1910 і 2001 гадах.
У суботу раніцай сабор зноў адкрыўся для турыстаў, акрамя пашкоджанай зоны, якая застаецца агароджанай. Эксперты падкрэсліваюць, што помнік у цэлым не страціў сваёй архітэктурнай цэласнасці і застаецца бяспечным для наведвання.