«Такое — паўсюдна». Відэа з каровамі ў гразі ў Добрушскім раёне стала вірусным у сацсетках
У сацыяльных сетках шырока распаўсюдзілася відэа, нібыта з фермы ў вёсцы Антонаўка Добрушскага раёна. На кадрах бачна, як каровы ў загоне ходзяць па гразі і гноі.
Скрын відэа
Запісы з’явіліся днём раней і былі выкладзены з ананімнага акаўнта, заўважыў «Флагшток». Ферма ў Антонаўцы сапраўды існуе — яна належыць дзяржаўнаму прадпрыемству ААТ «Чырвоная Буда», пра якое амаль няма згадванняў у інтэрнэце. Тэлефоны гаспадаркі недаступныя — магчыма, адключаныя.
Вядома, што ў 2018 годзе КДК выявіў на гэтым прадпрыемстве масавыя парушэнні: недахоп статка, прыпіскі вагі, завышэнне аб’ёмаў вытворчасці і скажэнне справаздачнасці.
Якасць відэа і недахоп падрабязнасцей не дазваляюць дакладна пацвердзіць, што здымкі зроблены менавіта на гэтай ферме.
Але пад відэа — тысячы каментароў, у якіх карыстальнікі дзеляцца сваімі назіраннямі — высветлілася, што праблема распаўсюджаная ў многіх сельгаспрадпрыемствах.
Частка каментатараў не верыць, што «такое магчыма ў Беларусі», але большасць сцвярджае, што падобная сітуацыя — звычайная з’ява. Некаторыя адзначаюць, што ўмовы ўтрымання буйной рагатай жывёлы на адкрытых загонах пагоршылі дажджы.
Карыстальнікі пішуць:
- «Добрушскі раён увесь такі».
- «80% такіх ферм у Беларусі».
- «Такое безладдзе адбываецца ва многіх гаспадарках, у Рагачоўскім раёне (у бок Доўска) амаль паўсюдна! На паперы ўсё добра і гладка, а насамрэч — да слёз!»
- «У мяне ў вёсцы такая ж ферма ёсць, пасля дажджоў каровы па вымя плаваюць».
- «Калінкавіцкі раён, Замосце — тое самае».
- «Я таксама такое бачыў, пакуль не агарадзілі бетонным плотам ад старонніх вачэй! Вёска Зарэчча, Мікалаеўскі сельсавет Светлагорскага раёна».
У каментарыях называюць і адрасы з іншых рэгіёнаў краіны.
Шмат хто з каментатараў і сам аўтар відэа хочуць, каб гэта «дайшло да Лукашэнкі». Пры гэтым адзначаецца, што той добра ведае пра агульную сітуацыю, але на публіку робіць «паказуху».