Забралі ліцэнзію ў адвакаткі Міколы Дзядка
Міністэрства юстыцыі пазбавіла ліцэнзіі адвакатку Святлану Гарбаток, заўважыла «Медыязона».
Святлана Гарбаток. Фота: «Медыязона»
Як сказана ў прэс-рэлізе Міністэрства юстыцыі, Святлана Гарбаток больш не можа працаваць адвакатам «з прычыны недастатковай кваліфікацыі». Такое рашэнне прыняла кваліфікацыйная камісія пры Мінюсце.
Святлана Гарбаток раней была абаронцай вядомага анархіста Міколы Дзядка і Уладзіміра Кнігі, якога судзілі па «справе Ціханоўскага».
Пераслед адвакатаў палітвязняў у Беларусі носіць сістэмны характар. З 2020 года як мінімум 141 адвакат у Беларусі страціў ліцэнзію. За чатыры гады як мінімум 11 адвакатаў падвергліся крымінальнаму пераследу, некаторыя да гэтага часу застаюцца ў зняволенні, напрыклад — Максім Знак, Віталь Брагінец, Аляксандр Данілевіч.
Выйшлі на волю пасля заканчэння свайго тэрміну або з'ехалі з краіны пад пагрозай пераследу адвакаты Ілля Салей, Андрэй Абразцоў, Міхаіл Макараў, Андрэй Мачалаў, Дзмітрый Пігуль.
Чытайце таксама:
Мінюст пазбавіў ліцэнзіі адваката, які ўхваляў увядзенне смяротнага пакарання за здраду дзяржаве