Базавая стаўка вырасце на тры рублі
З 1 верасня памер базавай стаўкі для аплаты працы ў бюджэтнай сферы складзе 273 рублі.
Адпаведную пастанову падпісаў прэм’ер-міністр Аляксандр Турчын.
Апошні раз базавую стаўку павышалі ў студзені. Цяпер яе памер складае 270 рублёў.
Павышэнне базавай стаўкі (не блытаць з базавай велічынёй) адаб'ецца на заробках работнікаў бюджэтных арганізацый, бо яна з'яўляецца асноўным элементам тарыфнай сістэмы. На яе велічыню раўняюцца пры вылічэнні аплаты працы бюджэтнікаў і прыроўненых да іх арганізацый, якія атрымліваюць субсідыі ад дзяржавы.
Акрамя таго, да базавай стаўкі прывязаныя стымуляцыйныя і кампенсавальныя выплаты. Такім чынам, іх памеры вырастуць прапарцыйна.