10-гадовая брытанка стала наймалодшай дзяўчынкай, якая перамагла шахматнага гросмайстра

Дзесяцігадовая дзяўчынка з Лондана Бадхана Сіванандэн стала наймаладзейшай шахматысткай, якая калі-небудзь перамагала гросмайстра. Яна атрымала другі па значнасці шахматны тытул — міжнароднага майстра, паведамляе CNN.

Бадхана Сіванандэн. Фота: x.com/FIDE_chess

Перамогу Бадхана атрымала ў фінале чэмпіянату Вялікабрытаніі, абыграўшы 60-гадовага Піта Уэлса. Паводле інфармацыі Міжнароднай федэрацыі шахмат, яна пабіла папярэдні рэкорд, пастаўлены амерыканкай Карысай Іп у 2019 годзе.

Летась дзяўчынка стала наймаладзейшай прадстаўніцай Англіі на міжнародных спаборніцтвах у любым відзе спорту, удзельнічаючы ў Шахматнай алімпіядзе ў Венгрыі.

Бацька Бадханы, Сіва, прызнаецца, што не ведае, адкуль у дачкі такі талент, бо ні ён сам, ні яе маці не ўмелі добра гуляць у шахматы. Дзяўчынка ўпершыню пачала гуляць падчас пандэміі COVID-19 у пяць гадоў, убачыўшы шахматную дошку ў торбе сябра бацькі.

Бадхана кажа, што шахматы дапамагаюць ёй добра сябе адчуваць і развіваць іншыя навыкі, напрыклад, матэматыку. Яна марыць дасягнуць найвышэйшага для шахматыстаў тытулу — гросмайстра.

Міжнародны майстар Малькальм Пэйн адзначае, што дзяўчынка сціплая, але яна выдатна грае ў шахматы і мае ўсе шанцы стаць гросмайстаркай або нават чэмпіёнкай свету сярод жанчын.

Каментары да артыкула