У Іванаўскім раёне дзяўчынка выратавала малодшую сястру, але не змагла ўратаваць дарослага
Побач з вёскай Кужэлічын на беразе Дняпроўска-Бугскага канала 17 жніўня адбыўся трагічны выпадак. Там адпачывала кампанія дарослых і дзяцей. Нягледзячы на тое, што месца не прызначана для купання, 26-гадовы хлопец вырашыў паплаваць і ўзяў з сабой у ваду сямігадовую дзяўчынку.
Яны знаходзіліся ў вадзе на адлегласці каля 15—20 метраў ад берага, калі мужчына раптоўна пачаў тануць. Ён паспеў адштурхнуць ад сябе дзіця, але сам пайшоў на дно.
Гэта заўважыла 12-гадовая сястра дзяўчынкі. Яна паклікала на дапамогу, сама надзела ратавальную камізэльку і кінулася ў ваду.
Дзякуючы яе рашучасці, дзіця ўдалося выратаваць.
Цела мужчыны было пазней знойдзена вадалазамі.