Прадукты з цвіллю і чарвякамі. Санстанцыя праверыла крамы, на якія скардзіліся пакупнікі
Парушэнні спецыялісты заўважылі не ва ўсіх крамах.
Пасля апублікаваных у тыктоку ролікаў, сталічныя цэнтры гігіены і эпідэміялогіі на працягу жніўня пазапланава праверылі некалькі гандлёвых кропак, піша «Мінск Навіны».
У краме «Святлафор» на вуліцы Лынькова, размешчанай у Масюкоўшчыне, мужчына выявіў каўбасу з цвіллю. Адпаведнае відэа набрала больш за 52 тысячы праглядаў.
«А потым гэтую каўбасу пратруць бруднай анучай з маслам, і яна будзе як новенькая», — пракаментавала здымку адна з глядачак, якую падтрымалі многія карыстальнікі.
Санстанцыя заўважыла ў гэтай краме толькі адзін від сыравэнджанай каўбасы — з ім усё было ў парадку, меліся адпаведныя дакументы. Пры гэтым у «Святлафоры» заўважылі іншыя парушэнні.
Наступным разам санстанцыя правярала «Суседзі» на праспекце Пераможцаў, 49. Там пакупніку дасталася курыная грудка з гнілатой унутры.
«Разразаю, мяса гнілое. Яно не тухлае, а проста гнілое, вельмі дзіўна», — дзівіцца хлопец, дэманструючы на відэа нягодны прадукт.
Спецыялісты адабралі пробы харчовай прадукцыі для правядзення лабараторных даследаванняў, аб выніках стане вядома пазней. Разам з тым на момант наглядных мерапрыемстваў умовы захоўвання і тэрміны прыдатнасці прадукцыі былі выкананыя.
Не знайшлі парушэнняў і ў «Маяку» на вулііцы Шаранговіча, 21. Напярэдадні там купілі скумбрыю, якая апынулася з цвіллю.
Праверылі і вулічны ларок каля дома №28 на вуліцы Гамарніка, дзе мужчына набыў персікі з чарвякамі. Там спецыялісты выявілі прадукцыю негарантаванай якасці і іншыя парушэнні патрабаванняў заканадаўства ў галіне забеспячэння санітарна-эпідэміялагічнага дабрабыту насельніцтва.
Фота: «Мінск Навіны»
Краме вынесена прадпісанне аб канфіскацыі з абарачэння названых прадуктаў і накіраваны рэкамендацыі.