«Алімавіч! У нас Пульва!» Мэр беларускага горада пераблытаў назву адзінай ракі, якая праз яго цячэ

У горадзе Высокае Камянецкага раёна (самым заходнім горадзе Беларусі) узнікла гучная гісторыя, звязаная з адзінай мясцовай ракой — Пульвай. Пры размове з мясцовым блогерам кіраўнік гарадскога выканаўчага камітэта Дзмітрый Зайцаў памылкова назваў яе «Лясной». Гэта выклікала бурную рэакцыю жыхароў, піша BGMedia.

Рака Пульва ў 2021 годзе

Відэа інтэрв’ю набрала дзясяткі тысяч праглядаў за некалькі дзён. У каментарыях да яго шмат гараджан выпраўлялі чыноўніка, нагадваючы, што мясцовая рэчка заўсёды называлася Пульвай і іншай назвы не мела.

У каментатараў можна было сустрэць як жарты кшталту: «Алімавіч! У нас Пульва!», так і сур’ёзныя патрабаванні нарэшце заняцца чысткай зарослага рэчышча ракі.

@domashuk река в г. Высокое #каменец #высокое #брестскаяобласть #каменецкийрайон #Брест ♬ оригинальный звук - Владимир Домащук

На відэа блогер акурат і размаўляў з чыноўнікам пра стан ракі. Мясцовыя жыхары абураліся, што рэчышча Пульвы моцна зарасло і адзначалі, што чыноўнікі не робяць абяцаную ачыстку нават падчас суботнікаў, хоць нібыта пра гэта і заяўляюць.

Дзеля вырашэння праблемы каментатары прапаноўвалі прымяніць спецыяльную тэхніку, перакрыць абвадны канал, паставіць дамбу і цалкам ачысціць раку, а простыя суботнікі, маўляў, не даюць эфекту, нават калі падчас іх што і робіцца. Многія адзначалі, што ў рацэ назіраецца масавая гібель рыбы, а наяўная на ёй дамба занядбаная.

Стан Пульвы ў снежні 2021 года. Фота: kamenec.by

Праблему зарослага рэчышча Пульвы ўжо падымалі ў горадзе ў 2021 годзе. Тады мясцовая раёнка пісала, што рэчышча месцамі настолькі вузкае, што яго з берага амаль не відаць. Падкрэслівалася, што чыстка і догляд за ракой патрабуюць немалых фінансавых сродкаў, але можна было б прыцягнуць мясцовых мужчын хоць бы падчас суботнікаў, каб ачысціць берагі ад расліннасці.

Экс-старшыня гарвыканкама Аляксандр Рагальчук тады тлумачыў, што чыстка ракі залежыць нібыта ад прыцягнення да выканання гэтай задачы асоб, асуджаных на грамадскія работы. І праблема ў тым, што ў 2021 годзе такіх людзей у Высокім, маўляў, не было, хоць яны маглі б стаць вырашальным рэсурсам для прыбірання. 

Скрыншот карты горада Высокае з сайта realt.by

Што да назвы ракі, то не толькі гараджане, але нават любыя карты выразна сведчаць, што ў горадзе Высокае цячэ толькі Пульва — яна дзеліць горад на дзве часткі і ўпадае ў Буг. Рака пад назвай Лясная знаходзіцца значна далей на поўдзень — яна цячэ праз Пружанскі і Камянецкі раёны, але да Высокага не даходзіць.

Такім чынам, Дзмітрый Зайцаў пераблытаў дзве розныя рэкі, якія працякаюць паралельна, але не перасякаюцца. Што дзіўна, таму што чыноўнік не прысланы аднекуль нядаўна, а жыве ў Высокім ужо не менш за два дзясяткі гадоў.

Скрыншот карты Камянецкага і Пружанскага раёнаў з Яндэкс.Картаў

Мясцовыя жыхары адзначаюць, што гэта не проста кур'ёзная геаграфічная памылка. Яны бачаць у ёй сімвал больш глыбокай праблемы: аддаленасці ўладаў ад рэальнага жыцця горада.

Зарослае рэчышча, нявыкананыя работы па ачыстцы і абслугоўванні, адсутнасць увагі да рэальных патрэб жыхароў — усё гэта выклікае абурэнне і недавер да кіраўніцтва горада. Людзі параўноўваюць сітуацыю з класічнымі бюракратычнымі абсурдамі, калі чыноўнікі не ведаюць нават назваў асноўных аб’ектаў горада, якім кіруюць.

Каментары да артыкула