Камуніст з Гомеля запісаўся добраахвотнікам на вайну на баку Расіі. І загінуў
Сяргей Скачкоў загінуў яшчэ ў верасні 2024 года, але пра ягоную смерць стала вядома толькі цяпер. Гэта была ягоная трэцяя вайна — ён паспеў паваяваць на баку Расіі ў Прыднястроўі і на Данбасе ў 2014 годзе. Пра ягоную смерць расказалі сталіністы з супольнасці «Агульная справа».
Сяргей Скачкоў. Фота з ягонай старонкі Укантакце
Сяргею Скачкову цяпер было б 55 гадоў. Ён родам з Гомеля. Скончыў Гомельскі дзяржаўны дарожна-будаўнічы тэхнікум у 1989 годзе.
Пасля гэтага яго прызвалі ў армію. Скачкоў адслужыў у вайсковай часці 40771 ваенна-марскога флоту СССР. Па звестках ягоных паплечнікаў са сталінісцкай групы «Агульная справа», у 1992 годзе ён вяртаўся дадому са службы. Але пазнаёміўся з казахамі, якія ехалі ў Прыднястроўе, і далучыўся да іх, каб ваяваць «супраць румынскіх нацыяналістаў». Атрымаў раненне і вярнуўся дадому.
Сяргей Скачкоў на дэмбелі. Фота з ягонай старонкі ў Аднакласніках
Да ад'езда ў Расію ў 2013 годзе Скачкоў працаваў у арганізацыі «Гомельпрамбуд» машыністам эскаватара. Пасля паехаў працаваць па гэтай жа спецыяльнасці ў Расіі.
У 2014 годзе паехаў ваяваць на баку Расіі ў так званую «ДНР». Служыў у «1-й асобнай гвардзейскай мотастралковай брыгадзе», створанай Стралковым-Гіркіным у Славянску. Кіраваў мінамётным разлікам.
Сяргей Скачкоў на вайне. Фота з ягонай старонкі ў Аднакласніках
Атрымаў кантузію ў 2015-м годзе, спачатку быў у шпіталі, а пасля вярнуўся ў Маскву.
Адметна, што на старонках Скачкова не ўздымаецца сацыяльных тэмаў, няма крытыкі палітыкі ў Беларусі ці Расіі або нейкіх камуністычных публікацый, хоць вядома, што сам сябе ён лічыў камуністам.
Увесь ягоны кантэнт складаецца з фота са зброяй, публікацый пра «герояў СВА» і радасці ад смерці ўкраінскіх вайскоўцаў.
Адна з характэрных публікацый Сяргея
Вядома, што ў 2022-м годзе Скачкоў вырашыў вярнуцца на вайну, бо даведаўся, што «ў ягонай мінамётнай батарэі нікога не засталося».
Загінуў ён у верасні 2024 года пры нявысветленых абставінах ва ўзросце 54 гадоў. У яго засталася сям'я з непаўналетнімі дзецьмі.
Чытайце таксама:
Памятаеце палітвязня Вітухноўскага, які пайшоў ваяваць за Расію? Ён ужо загінуў
На фронце загінуў 27-гадовы хлопец з Вілейкі, які змагаўся на баку Расіі
Стала вядомая асоба вагнераўскага блогера Grey Zone з 550 тысячамі падпісчыкаў, які загінуў у Малі