Францыя стаіць на парозе новага палітычнага крызісу

8 верасня дэпутаты французскага парламента будуць галасаваць па вотуме даверу ўраду. Калі кабінет пойдзе ў адстаўку, гэта будзе ўжо трэці ўрад за апошні год, што ўзмацняе напружанасць і выклікае занепакоенасць на фінансавых рынках, піша Euronews.

Прэм'ер-міністр Францыі Франсуа Байру. Фота: Ameer Alhalbi/Getty Images

Прэм’ер-міністр Францыі Франсуа Байру абараняе план эканоміі, які прадугледжвае зніжэнне дзяржаўных выдаткаў на 44 мільярды еўра да 2026 года, каб скараціць дэфіцыт ніжэй за 3% ВУП да 2029-га. Сярод яго прапаноў — барацьба з падатковымі махлярствамі і нават адмена двух дзяржаўных святаў.

Аднак апазіцыйныя сілы, уключаючы «Нацыянальнае аб’яднанне», «Непакорную Францыю», камуністаў і «зялёных», ужо абвясцілі, што будуць галасаваць супраць.

У той жа час Еўрасаюз чакае ад Францыі выканання бюджэтных абавязацельстваў. Калі ўрад разваліцца, гэта ўскладніць узгадненне бюджэту і падарве давер да Парыжа.

Эксперты папярэджваюць, што нестабільнасць можа аслабіць пазіцыі Францыі ў ЕС, у тым ліку пры прыняцці рашэнняў у сферы гандлю, прамысловай палітыкі, зялёнай трансфармацыі і тэхналагічных зменаў.

У чэрвені міністр фінансаў Францыі Амелі дэ Маншален нават гаварыла пра рызыку міжнароднага кантролю над французскімі фінансамі, хоць кіраўніца Еўрапейскага цэнтральнага банка Крысцін Лагард выключыла магчымасць такога ўмяшання.

Эканамічная сітуацыя ў Францыі на гэты момант наступная:

• ВУП Францыі у другім квартале 2025 года вырас на 0,3% і склаў 657,6 мільярда еўра;
• За 2024 год ВУП дасягнуў 2,92 трыльёна еўра, што робіць Францыю другой эканомікай ЕС пасля Германіі;
• Дзяржаўны доўг на канец І квартала 2025 склаў 3,345 трыльёна еўра (113,9% ВУП);
• Дэфіцыт бюджэту ў 2024 годзе склаў 169,7 мільярда еўра (5,8% ВУП).

Гэтыя паказчыкі значна перавышаюць крытэрыі Маастрыхцкай дамовы, паводле якіх доўг не павінен перавышаць 60% ВУП, а дэфіцыт — 3%.

Каментары да артыкула