За незарэгістраваныя самакаты штрафаваць пакуль што не будуць

Міністр унутраных спраў Іван Кубракоў заявіў, што тэрмін спрошчанай рэгістрацыі хуткасных электрасамакатаў і падобных прылад могуць падоўжыць.

Фота ілюстрацыйнае

Паводле новых правіл дарожнага руху, электрасамакаты, здольныя развіваць хуткасць больш за 25 км/г, неабходна зарэгістраваць у ДАІ пасля праверкі і атрымання электроннага пашпарта ў адной з лабараторый.

Пакуль, аднак, калі верыць Івану Кубракову, ДАІ нацэленая не на прыцягненне да адказнасці, а на тлумачэнне новых правіл.

«Ніхто нікога не будзе прыцягваць да адміністрацыйнай адказнасці. Рэкамендаваць, расказваць, тлумачыць, куды звярнуцца — так, будуць, але прыцягваць да адказнасці не будуць», — цытуе Кубракова тэлеграм-канал МУС.

Паводле ўказа, падпісанага ў верасні 2025 года, зарэгістраваць транспарт трэба да 1 верасня 2026 года. Калі хто не паспее, то МУС можа звярнуцца да Лукашэнкі з просьбай падоўжыць тэрмін дзеяння ўказа.

Рэгістрацыя праходзіць у два этапы: спачатку трэба атрымаць электронны пашпарт у адной з 25 акрэдытаваных лабараторый (спіс даступны на сайце Дзяржстандарта), а пасля гэтага — зарэгістраваць прыладу ў ДАІ. Ездзіць на транспарце можна толькі ў шлеме, па дарогах і абавязкова з правамі адпаведнай катэгорыі: АМ, А1 ці А, у залежнасці ад магутнасці рухавіка.

Некаторыя прылады не падлягаюць рэгістрацыі, напрыклад, хуткасныя манаколы.

Каментары да артыкула