У сталіцы 90% настаўнікаў — жанчыны
У Мінску новы навучальны год пачаўся для больш чым 228 тысяч вучняў і 16,6 тысячы настаўнікаў. Да прафесійнага свята настаўнікаў, якое традыцыйна адзначаецца ў першую нядзелю кастрычніка, Галоўнае статыстычнае ўпраўленне горада Мінска апублікавала некаторыя звесткі пра сістэму адукацыі.
У сталіцы ў 2024/2025 навучальным годзе ў школах працуе 16,6 тысячы педагогаў, якія навучаюць 228,6 тысячы вучняў у 269 установах агульнай сярэдняй адукацыі.
Сярэдняя нагрузка ў Мінску — 14 вучняў на аднаго настаўніка.
Больш за палову сталічных педагогаў працуюць у школе больш за 15 гадоў. Моладзь да 30 гадоў складае каля 20%, а настаўнікі, што дасягнулі пенсійнага ўзросту, — каля 16%.
Амаль 90% педагагічных кадраў у сталіцы — жанчыны (па краіне — 88%).
98% выкладчыкаў беларускай мовы, 97,7% рускай, 97% замежных моў — жанчыны. Нават у 62% выпадкаў працоўнае навучанне выкладаюць жанчыны, у 55% — фізічную культуру, у 39% — дапрызыўную падрыхтоўку.
Сярэдняя намінальная налічаная зарплата настаўнікаў у сталіцы за студзень—жнівень 2025 года склала 2 608 рублёў (альбо 2146 пасля падаткаў).
Усяго ў Беларусі працуе больш за 102 тысячы педагогаў.