Украіна паказала новы марскі дрон, які падарваў Крымскі мост

Служба бяспекі Украіны прадэманстравала марскія дроны Sea Baby новага пакалення, якія выканалі сакрэтную ролю ў падрыве Крымскага моста ў чэрвені гэтага года. Сцвярджаецца, што яны могуць змяніць баланс сіл на Чорным моры.

Новае пакаленне Sea Baby з баявым модулем «Таўрыя 14,5». Фота: СБУ

Як паведамляе Defense Express, на прэзентацыі спецслужбы Украіны паказалі два тыпы беспілотнікаў Sea Baby новага пакалення. Мяркуецца, што абодва яны здольныя несці баявую частку вагой 900 кг, якую можна выкарыстоўваць як для камікадзэ-атакі, так і для самазнішчэння дрона ў выпадку немагчымасці яго вяртання на базу. Дрон мае ўражлівую далёкасць ходу да 1500 км і можа перавозіць агулам да 2 тон карыснай нагрузкі.

Па словах брыгаднага генерала СБУ Івана Лукашэвіча, менавіта гэтыя беспілотнікі ў абноўленай версіі выканалі сакрэтную ролю падчас адной атакі на Крымскі мост 3 чэрвеня 2025 года, даставіўшы выбухоўку для яго паражэння.

Варыянт 1: «Марскі знішчальнік»

Першы прадстаўлены тып дрона прызначаны для знішчэння варожых марскіх беспілотнікаў. Гэтая ідэя, па словах Лукашэвіча, была ініцыяваная кіраўніком СБУ Васілём Малюком яшчэ год таму.

Для выканання гэтай задачы дрон узброены стабілізаваным баявым модулем «Таўрыя 14,5» з кулямётам калібру 14,5 мм (КПВТ). Яго стандартны боекамплект складае 200 стрэлаў. Оптыка модуля дазваляе выяўляць цэлі на адлегласці да 5 км днём і ўначы, а сам кулямёт здольны эфектыўна паражаць цэль тыпу «марскі дрон» на дыстанцыі больш за 1 кіламетр.

За баявым модулем размешчаны два кантэйнеры, візуальна падобныя да тых, што выкарыстоўваюцца для запуску FPV-дронаў, якія могуць служыць дадатковым сродкам паражэння.

Акрамя ўзбраення, на корпусе размешчаны камеры, антэны сувязі і, верагодна, невялікая суднавая РЛС або тэрмінал спадарожнікавай сувязі.

Варыянт 2: Носьбіт рэактыўных снарадаў

Што тычыцца другога тыпу прадстаўленага Sea Baby новага пакалення, то тут усё крыху цікавей. Гэтая мадыфікацыя абсталявана 10‑зараднай 122‑мм рэактыўнай сістэмай залпавага агню (РСЗА) «Град», што ператварае Sea baby у мабільную марскую артылерыю. Спецыяльны механізм дазваляе падымаць і апускаць пускавую ўстаноўку для навядзення.

Аднак эксперты мяркуюць, што гэтае ўзбраенне, хутчэй за ўсё, прызначана для вядзення агню прамой наводкай у межах бачнасці. Улічваючы нізкую дакладнасць самой сістэмы «Град», стральба па навясной траекторыі з такой нестабільнай платформы, як марскі дрон, была б практычна неэфектыўнай.

Варта адзначыць, што гэта не першая спроба ўсталяваць накіравальныя ад «Града» на Sea Baby — падобныя эксперыменты праводзіліся і раней, але ў новай версіі гэтая ідэя была тэхнічна дапрацавана.

На першым плане — Sea Baby з баявым модулем «Таўрыя 14,5», а за ёй — версія з 10‑ці зараднай РСЗА «Град». Фота: СБУ

Галоўнае новаўвядзенне — модульнасць

Як адзначаюць эксперты, ключавой асаблівасцю новага пакалення Sea Baby з'яўляецца іх модульная канструкцыя. Абодва паказаныя варыянты выкарыстоўваюць аднолькавы корпус практычна без дапрацовак. Усё ўзбраенне і дадатковае абсталяванне размяшчаюцца на спецыяльным каркасе, які мацуецца да корпуса дрона шрубамі.

Гэта азначае, што новы Sea Baby з'яўляецца ўніверсальнай базай, на якую ў залежнасці ад місіі можна хутка ўсталяваць неабходны модуль з узбраеннем — кулямётны, ракетны ці іншы. Гэта значна паскарае і зрабіла таннейшым працэс падрыхтоўкі дрона да задачы і інтэграцыі новых відаў зброі, у адрозненне ад ранейшых версій, дзе ўзбраенне манціравалася непасрэдна на корпус, што патрабавала зменаў у канструкцыі.

Як піша выданне B-TECH, стратэгічнае значэнне Sea Baby цяжка пераацаніць. У рэгіёне Чорнага мора, дзе традыцыйныя флаты і базы маюць свае абмежаванні, з'яўленне танных, мабільных, аўтаномных ударных платформ змяняе баланс сіл. Праціўніку даводзіцца або ўзмацняць абарону, або пераглядаць тактыку, а Украіна атрымлівае новую зброю з доўгатэрміновым эфектам. Больш за тое, камерцыялізацыя і краўдфандынг такіх праектаў ствараюць прэцэдэнт: грамадзянскі ўдзел у абароне становіцца часткай стратэгіі.

Каментары да артыкула