На Усходніх могілках адкрыюць надмагільны манумент Змітраку Бядулю
3 лістапада на Усходнік могілках у Мінску адбудзецца цырымонія адкрыцця надмагільнага манумента знакамітаму беларускаму пісьменніку і грамадскаму дзеячу Змітраку Бядулю. Мерапрыемства прымеркавана да Дня памяці класіка, паведамляе Дзяржаўны музей гісторыі беларускай літаратуры.
Эскізны варыянт надмагільнага помніка Змітраку Бядулю. Скрыншот з відэарэпартажу АНТ
Змітрок Бядуля (сапраўднае імя Самуіл Плаўнік) нарадзіўся 23 красавіка 1886 года ў вёсцы Пасадзец Лагойскага раёна. Гэта адзін з найбольш вядомых прадстаўнікоў беларускай літаратуры пачатку ХХ стагоддзя, творчасць якога зрабіла значны ўнёсак у развіццё нацыянальнай культуры і літаратурнай мовы.
Змітрок Бядуля
3 лістапада 1941 года 55‑гадовы Змітрок Бядуля памёр у эвакуацыі каля горада Уральск у Казахстане, дзе і быў пахаваны на гарадскіх могілках.
У лютым 2020 года адбылася эксгумацыя парэшткаў класіка, яны былі дастаўленыя самалётам з Казахстана ў Беларусь. 3 лістапада 2020 года прах пісьменніка перапахавалі на Усходніх могілках у Мінску.
Дзяржаўны музей гісторыі беларускай літаратуры выступіў ініцыятарам дабрачыннага збору сродкаў на стварэнне надмагільнага манумента пісьменніка. У выніку праведзенай працы ўдалося сабраць палову неабходнай сумы на стварэнне помніка. Астатняя частка фінансавання была выдзеленая з дзяржаўнага бюджэту.
Помнік стварылі скульптар Сяргей Гумілеўскі і архітэктар Віктар Карака.
Ушанаваць памяць Змітрака Бядулі збяруцца літаратары, дзеячы культуры, нашчадкі, дабрачынцы і прыхільнікі яго творчага таленту.
Пачатак цырымоніі — 3 лістапада а 12‑й гадзіне.
Чытайце таксама:
ТЭСТ: Ці добра вы ведаеце гісторыю беларускіх габрэяў?
Каго з беларускіх пісьменнікаў найбольш выдавалі за савецкім часам? Не ўсіх вы ведаеце