Хочаце выглядаць модна? Дадайце да вобразу чырвоны трыкатаж
Калі за акном пахмурна і халодна, а ў шафе — толькі шэрыя і карычневыя рэчы, ёсць адзін просты спосаб вярнуць сабе жыццёвы тонус. Дадайце крыху чырвонага. Як порцыя вострага перцу, чырвоны трыкатаж можа ажывіць нават самы нейтральны вобраз.
Аўстрыйская мадэль Мэрліс Пія Пфайфхофер. Лістапад 2025 года. Фота: Moritz Scholz / Getty Images
Не абавязкова купляць дарагія брэнды. Дастаткова звычайнага світара, кардыгана або шаліка — галоўнае, каб ён быў чырвоны. Гэты невялікі акцэнт здольны ажывіць самы звычайны ўбор. У сацыяльных сетках і фэшн-медыя папулярныя нават «тэорыя нечаканага чырвонага» і «тэорыя чырвоных шкарпэтак».
З чым спалучаць
Чырвоны добра спалучаецца з джынсамі, карычневымі штанамі, шэрым паліто ці звычайнай белай кашуляй.
Як адзначаюць дызайнеры, дабаўленне ў вобраз аднаго яркага чырвонага вязанага элемента імгненна робіць увесь ансамбль больш цікавым, модным і энергічным.
Найлепш чырвоны трыкатаж спалучаецца з базавымі, нейтральнымі колерамі (шэры, чорны, бэж, белы, дэнім).
Чырвоны колер выступае ў якасці моцнага, але лёгкага акцэнту, які падымае настрой, падобна чырвонай памадзе.
На моднай вечарынцы Vogue World: Hollywood 2025 у Лос-Анджэлесе мадэль дэманструе адзін з самых яркіх вобразаў. Фота: Gonzalo Marroquin / Getty Images for Vogue
«Чырвоны прымушае сэрцы біцца хутчэй, а ўпэўненасць расце. Ён магутны, гарачы і, верце ці не, нават мае гаючую энергію. Правільнае адценне чырвонага прымушае людзей адчуваць сябе гаспадаром сітуацыі»,
— адзначае Рэйчал Сондэрс, сузаснавальніца кансультацыйнай кампаніі па колеры і стылі Red Leopard у інтэрв'ю The Telegraph.
Падчас Лонданскага тыдня моды на мадэлі ірландскай дызайнеркі Сімоны Роча кардыган быў у якасці дэкаратыўнага элемента. Фота: Alessandro Lucioni / Gorunway.com
Як абраць і насіць
Сондэрс раіць пры выбары адцення чырвонага ўлічваць колер скуры:
— калі ваша скура больш светлая або мае блакітна-ружавае адценне — паспрабуйце цёплы чырвона-аранжавы;
— калі больш смуглая або мае залацістае адценне — лепш выбіраць халаднаватыя вішнёвыя і бардовыя.
Зразумела, многае залежыць ад таго, як вы носіце гэты колер.
Самы просты варыянт — незашпілены кардыган паверх белай майкі і джынсаў. Майка разбівае яркі колер і робіць убранне больш лёгкім.
Фэшн– інфлюэнсар Омер Эльсараг на гала‑вечары Nouvelle Vague у рамках 69‑га Лонданскага кінафестывалю. Лондан, 18 кастрычніка 2025 года. Фота: Gareth Cattermole / Getty Images for BFI
Калі хочаце больш смелы вобраз, абярыце аб’ёмны світар ярка-памідорнага адцення — цудоўна глядзіцца з карычневымі штанамі. Яркі джэмпер добра спалучаецца з цёмнымі джынсамі, а насычаны чырвоны колер выглядае шыкоўна з карычневымі шырокімі штанамі-«бочкамі» і класічнымі касцюмамі.
Калі хочацца толькі невялікага акцэнту, абярыце шалік, шапку ці пальчаткі.
Чырвоны світар можна і не апранаць — дастаткова павязаць яго на плечы або на пояс, каб зрабіць убранне больш жывым.
Чытайце таксама:
Байкерскія боты вяртаюцца ў моду. Як іх насіць?
Носіце пінжак з джынсамі? Вось памылкі, якія многія робяць