Госця свецкага вечара ў Мінску шакавала сукенкай з галавой казулі
«Казулі лічацца чарадзейнымі, і іх выкарыстоўваюць у вырабе амулетаў і талісманаў, і гэта сёння мой абярэг».
Дызайнерка Алена Ацапкіна ў эпатажным уборы. Фота: hard_marks / Instagram
У суботу ў Мінску праходзіў модны паказ Fashion Fabrique ў Dipservice Hall. Асаблівую ўвагу прыцягнуў эпатажны ўбор адной з госцяў.
Дызайнерка Алена Ацапкіна прыйшла ў чорнай сукенцы, драпіраванай футрам, з галавой казулі з пазалочанымі рагамі.
«Гэта прыгожая жывёліна, якая была створана для прыгажосці. Яна ўпрыгожвае лугі нашы, палі і ў тым ліку сёння мой убор. Гэта вырабы майго брэнду.
Не проста так яна [казуля] сёння ўпрыгожвае мой убор. Казулі лічацца чарадзейнымі, і іх выкарыстоўваюць у вырабе амулетаў і талісманаў, і гэта сёння мой абярэг», — расказала дызайнерка пра свой вобраз блогу пра моду «Тяжелый Маркс».
Блог дадаў, што сапраўдныя ў гэтым уборы толькі рогі.
У каментарах многія жахнуліся з такога крэатыву.
«Будзем ведаць, які беларускі «брэнд» абыходзіць бокам. «Дызайнеру» зычым разважлівасці».
«Чамусьці зусім не верыцца, што ўсе астатнія элементы штучныя».
Фота: «Анлайнер»
Фота: «Анлайнер»
Хаця некаторыя пабачылі ў гэтым адсылку да паказу французскага брэнду Schiaparelli ў 2023 годзе — калі мадэлі дэфілявалі ў сукенках з галавой ільва і воўка.