«Гэта што за вірус?» Прыхільніцы Лукашэнкі не спадабаліся надпісы на дзіцячай пляцоўцы

Прыхільніца Лукашэнкі не задаволеная сітуацыяй на дзіцячай пляцоўцы ў раёне «Мінск-Свет». Па яе словах, там пастаянна працягваюць з’яўляцца надпісы з народнымі лозунгамі, такімі як «Верым, можам, пераможам», а таксама белыя палоскі на чырвоным пакрыцці, што ўтвараюць бел-чырвона-белы сцяг, заўважыла BGmedia.

Надпісы на пляцоўцы ў раёне «Мінск-Свет». Скрыншот з відэа

Жанчына пад нікам lana.holl апублікавала ў тыктоку відэа, у якім паказала дзіцячую пляцоўку, дзе, паводле яе слоў, «людзі ўсё ніяк не супакояцца».

Пляцоўку рэгулярна размалёўваюць, і аўтарка не разумее, што рухае тымі, хто гэта робіць.

«Напэўна, гэта нейкі вірус іх моцна трымае, што ім нічога не дапамагае. Усё пераможам, верым… Я не магу. Іх напэўна неяк пакусалі? Вось гэтыя малюнкі тут з’яўляюцца кожны раз! Іх зачышчаюць, але яны нанова з’яўляюцца. Вось што людзям трэба? У каго мозг проста ўжо згніў… Вось гэта напэўна малююць падлеткі хутчэй за ўсё. Ім год па дзесяць, максімум дванаццаць. Размовы іх таксама можна паслухаць, там вушы ўжо скручваюцца», — адзначае аўтарка відэа.

Жанчына абураецца тым, што надпісы знікаюць толькі на кароткі час, бо людзі вяртаюцца і малююць іх наноў.

@lana.holl #беларусь #бчб #минск #город ♬ Oh No - Kreepa

У каментарах сустрэліся прыхільнікі Лукашэнкі, якія пагадзіліся з аўтаркай відэа. Некаторыя з іх адзначылі, што гэтыя надпісы вельмі страшныя, і за іх людзей трэба саджаць у турмы ці прыцягваць да грамадскіх работ.

Аднак сустрэліся і тыя каментатары, якія падтрымалі мастакоў.

• «Дзеці вераць у лепшае. Мы ў дзяцінстве таксама малявалі сваю будучыню».
• «Ха-ха! Мінчукі ведаюць, куды пераехала вёска!», — жартуюць людзі пра аўтарку відэа.
• «Дзеці малююць крэйдай, так было заўсёды. Не бачу праблем. Беларускую мову практыкуюць».

Каментары да артыкула