Хлопец атруціўся падчас рамантычнай вячэры ў рэстаране. І змог дабіцца кампенсацыі ў 1100 рублёў
Рэстаран вярнуў яму таксама грошы за вячэру і лекі.
Ілюстрацыйны здымак. Фота: «Наша Ніва»
Пра справу «Мінск-Навінам» расказала Рэспубліканскае таварыства абароны правоў спажыўцоў, куды звяртаўся па дапамогу пацяперлы.
Пара схадзіла на рамантычны вечар у рэстаран. Назва ўстановы не называецца, вядома толькі, што была небеларуская кухня. На наступны дзень малады чалавек адчуў сябе дрэнна. Атручванне суправаджалася болем у жываце, млоснасцю, ванітамі і высокай тэмпературай. Хуткая даставіла хлопца ў бальніцу. На падставе аналізаў дактары паставілі дыягназ «сальманелёзны энтэрыт сярэдняй цяжкасці». Хлопец правёў у бальніцы некалькі дзён.
З дзяўчынай пасля вячэры ўсё было добра.
Малады чалавек звярнуўся ў раённы цэнтр гігіены і эпідэміялогіі па месцы размяшчэння ўстановы з пісьмовай заявай. У выніку праверкі ў рэстаране знайшлі санітарныя парушэнні.
Пасля хлопец апісаў у кнізе скаргаў і прапаноў рэстарана тое, што з ім здарылася, і прапанаваў вярнуць яму грошы за вячэру і лекі і кампенсаваць маральную шкоду. Але адказу не атрымаў. Таму пайшоў у суд.
На першае пасяджэнне ад рэстарана ніхто не прыйшоў. На другім прадстаўнікі ўстановы ўжо былі і прапанавалі пайсці на міравую.
Рэстаран пагадзіўся кампенсаваць кошт вячэры і лекаў, выплаціць няўстойку за парушэнне тэрмінаў задавальнення патрабаванняў пацярпелага і пагасіць судовыя выдаткі таварыства абароны спажыўцоў. Таксама пагадзіўся кампенсаваць маральную шкоду — 1100 рублёў.