Літоўскія фуры паехалі з месцаў стаянак у Каменны Лог і Беняконі
Раней дазвалялі выязджаць толькі тым літоўскім фурам, якія заехалі ў Беларусь пасля адкрыцця мяжы.
Літоўскія фуры паехалі з месцаў стаянак у Беларусі ў Літву праз «Каменны Лог — Меднікі» і «Беняконі — Салечнікі». Перашкод з боку Беларусі на перамяшчэнне літоўскіх грузавікоў няма, паведамляе канал Infotrans Media Belarus.
Фуры могуць рухацца ў бок Літвы праз два пераходы — «Каменны Лог — Меднікі» і «Беняконі — Салечнікі».
«Каменны Лог» забіты пад завязку літоўскімі грузавікамі. Прапускная здольнасць грузавікоў на літоўскіх «Медніках» не павялічылася, піша канал. Усе 100% грузавікоў, якія едуць з Беларусі ў Літву, накіроўваюць на рэнтген, адзначаюць у Асацыяцыі інтэрмадальных перавозак і лагістыкі («АІПЛ»).
Інтэнсіўны паток грузавікоў ідзе і ў зваротным кірунку з Літвы ў Беларусь. На «Медніках» рух вельмі інтэнсіўны, аднак з боку Літвы працуе толькі адно акно.
Пасля таго як Літва закрыла мяжу, Беларусь у адказ не дазволіла літоўскім фурам вярнуцца ў Літву. 20 лістапада Літва мяжу адкрыла, але фураў па-ранейшаму не выпускалі.