У Швецыі знайшлі палявы дзённік караля Карла XII. Там ёсць і пра Беларусь
У Швецыі знайшлі палявы дзённік караля Карла XII, які вёўся ім падчас Паўночнай вайны пачатку XVIII стагоддзя, якая ішла ў тым ліку і на беларускіх землях, паведаміў на сваёй старонцы ў фэйсбуку гісторык Андрэй Катлярчук. Ён назваў гэту падзею архіўнай сенсацыяй.
Па словах Катлярчука, у гэтым дзённіку сярод іншага ёсць нататкі шведскага караля пра Мінск, Галоўчын, Магілёў, а таксама пра пераход гетмана казацкай Украіны Івана Мазепы на бок шведаў.
268‑старонкавая кніга з нататкамі і малюнкамі, якія Карл XII уласнаручна рабіў у паходах, была знойдзена ў бібліятэцы Гётэборгскага ўніверсітэта, паведамляюць на сайце ўніверсітэта.
«Ніхто не ведаў, што яна існуе», — кажа даследчыца Антаанета Гранберг, якая знайшла кнігу, калі шукала славянскія рукапісы ў вялікім зборы Hvitfeldtska samlingen (Хвітфельцкая калекцыя), які дагэтуль не каталагізаваны.
Нататкі з кнігі ахопліваюць перыяд ад лета 1707 года да восені 1717 года. Акрамя самога караля, таксама тут рабілі запісы ягоныя памочнікі Карл Піпер і Самуэль Окерхельм.
Гранберг даведалася таксама, што ў Швецыі захоўваюцца іншыя, раней вядомыя копіі дзённіка, але яны не маюць ілюстрацый, што ўтрымліваюцца ў арыгінале.
Абяцаюць, што дзённік хутка будзе дыгіталізаваны і даступны на старонцы бібліятэкі Гётэборгскага ўніверсітэта.
Чытайце таксама:
Ці быў Наваградак першай сталіцай ВКЛ. 10 фактаў пра старажытны горад, які адзначыў 980 год
Гісторык знайшоў у Швецыі паштоўку, якую падпісаў больш за сто гадоў таму беларус на эсперанта