Арыштаваны ўладальнік бара ў Швейцарыі, дзе загінулі 40 чалавек
У Швейцарыі, паводле паведамленняў мясцовай прэсы, затрыманы ўладальнік бара, у якім у навагоднюю ноч у выніку пажару загінулі 40 чалавек, піша Бі-бі-сі.
Фотаздымак, на якім, меркавана, засняты пачатак пажару ў бары Le Constellation, выкліканы бенгальскімі агнямі ў шампанскім. Фота з сацсетак
Уладальнік бара, грамадзянін Францыі Жак Марэці, быў затрыманы, паколькі праваахоўныя органы палічылі, што ён можа ўцячы.
На гэтым тыдні стала вядома, што на працягу апошніх пяці гадоў у бары не праводзіліся супрацьпажарныя праверкі.
Швейцарская пракуратура распачала справу супраць Марэці і яго жонкі Джэсікі, саўладальніцы бара.
Пракуратура кантона Вале прад’явіла ім падазрэнні ў нядбайнасці, якая прывяла да смерці і калецтваў.
«Пракуратура прыняла рашэнне звярнуцца ў Суд прымусовых мер з просьбай заключыць менеджара [бара] пад варту», — заявіла ў пятніцу пракуратура Вале, маючы на ўвазе Жака Марэці.
Неўзабаве пасля гэтай заявы швейцарская газета 24 Heures паведаміла, што Жак Марэці сапраўды ўжо ўзяты пад варту.
Як перадае агенцтва Reuters, у пятніцу Жак і Джэсіка Марэці прыбылі ў пракуратуру ў сталіцы кантона Вале — горадзе Сьён. На пытанні журналістаў яны адказваць адмовіліся.
У пажары ў бары Le Constellation на гарналыжным курорце Кран-Мантана загінулі 40 чалавек, у тым ліку шмат непаўналетніх. Апёкі і траўмы атрымалі 116 чалавек.
Паводле дадзеных следства, пажар пачаўся са гукаізаляцыйнага пакрыцця столі ў падвальнай частцы бара, якое ўспыхнула ад занадта блізка паднесеных да яго бенгальскіх агнёў, прымацаваных да бутэлек шампанскага і паднятых угару кампаніяй, што святкавала.
У пятніцу ў Швейцарыі быў абвешчаны дзень жалобы па ахвярах пажару ў Кран-Мантане. Раніцай у краіне прайшла хвіліна маўчання. Званілі званы ўсіх цэркваў, спыніліся цягнікі і трамваі, ненадоўга была перапынена праца аэрапортаў.