У загінулай у Сляпянцы дзяўчыне апазналі Яну Кастранкову

Паведамленне пра тое, што Яна Кастранкова загінула, з'явілася на старонцы пошукавага атрада «Анёл».

«Кастранкова Яна Юр'еўна знойдзеная. Выказваем спачуванні родным і блізкім загінулай», — піша пошукавы атрад «Анёл».

Раней Следчы камітэт паведаміў, што адзенне дзяўчыны, якую знайшлі сёння ў вадаёме Сляпянскай воднай сістэмы, па знешніх прыкметах падобнае да таго, у якое была апранутая зніклая незадоўга да таго Яна Кастранкова.

Карта месцаў, дзе апошні раз бачылі Яну і дзе знайшлі яе цела. Калаж: «Наша Ніва»

Сувязь з дзяўчынай знікла 30 снежня 2025 года. Яна жыла ў «Маяку Мінска».

Маці Яны пісала ў сацсетках, што апошні раз тэлефон яе дачкі быў зафіксаваны ў той дзень у 18:27 побач з паркам Чалюскінцаў. Жанчына казала, што размаўляла з дачкой у дзень знікнення прыблізна ў 14:30. Тая казала, што, імаверна, прыйдзе да бацькоў сустракаць Новы год.

Дзякуючы гарадскім камерам атрымалася высветліць толькі тое, што ў 16:30 Яна заходзіла ў «Дана Мол», а пасля сустракалася з жанчынай ля метро «Уручча». Тая жанчына была ўладальніцай кватэры, якую Яна хацела арандаваць, але перадумала — ля метро жанчына вярнула ёй задатак.

Cкрыншоты відэа з камер назірання, выкладзенага ў сацсеткі. Знята яно 30 снежня каля 14.00. Яна заходзіць у пад'езд свайго дома (вул. К. Тураўскага, 14).

12 студзеня ў вадаёме Сляпянскай воднай сістэмы знайшлі цела дзяўчыны. У загінулай апазналі Яну.

Як аказалася, цела дзяўчыны знайшлі ў вадзе прыкладна за адзін кіламетр ад парка Чалюскінцаў, дзе яе тэлефон зафіксавалі апошні раз.

Яна Кастранкова. Фота з яе сацсетак

21‑гадовая Яна Кастранкова, мяркуючы па сацсетках, працавала фатографкай. Гэта дачка Юрыя Кастранкова, дырэктара ААТ «Агра-Ляскавічы» (гаспадарка ўваходзіць у структуру Кіраўніцтва справамі прэзідэнта). Юрыя прызначылі на пасаду летась у лютым 2025 года. Пару месяцаў таму ён даваў справаздачу Лукашэнку, які вырашыў наведаць агракомплекс ва ўзорным аграгарадку ў Петрыкаўскім раёне.

Каментары да артыкула