Трамп адмаўляе, што адмяніў удары па Іране пад нечым уплывам, і дзякуе іранскім уладам

Дональд Трамп заявіў, што ніхто не спрабаваў уплываць на яго рашэнне і адгаворваць ад удару па Іране — ён прыняў гэтае рашэнне самастойна.

Дональд Трамп. Скрыншот з відэа

«Мяне ніхто не пераконваў. Я пераканаў сам сябе», — сказаў Трамп, пахваліўшы пры гэтым іранскую ўладу.

«Яны збіраліся павесіць больш за 800 чалавек учора, і я вельмі паважаю той факт, што яны гэта адмянілі. Дзякуй!» — дадаў ён.

Раней паведамлялася, што на рашэнне Трампа не рабіць супраць Ірана актыўных ваенных дзеянняў паўплывалі кіраўнікі краін Персідскага заліва — Саудаўскай Аравіі, Катара і Амана.

Журналісты пацікавіліся ў прэзідэнта ЗША, ці застаюцца ў сіле ягоныя ранейшыя словы пра тое, што дапамога ўдзельнікам антыўрадавых пратэстаў у Іране з боку ЗША «ўжо ў дарозе».

У адказ Трамп сказаў, што гэта яшчэ будзе вырашацца. «Мы паглядзім», — заявіў ён.

Каментары да артыкула