Лукашэнка даў Селіверставу дадатковыя паўнамоцтвы
Юрый Селіверстаў, прызначаны 22 студзеня паслом Беларусі ў Расіі, таксама будзе прадстаўляць Беларусь у Эканамічнай радзе СНД, займацца пытаннямі інтэграцыйнага супрацоўніцтва ў рамках «Саюзнай дзяржавы», Еўразійскага эканамічнага саюза, СНД і АДКБ. Наконт гэтага Лукашэнка падпісаў асобны ўказ.
Юрый Селіверстаў
У адпаведнасці з указам, Селіверстаў атрымаў паўнамоцтвы намесніка прэм’ер-міністра па пытаннях дзейнасці Беларусі ў рамках «Саюзнай дзяржавы» і адносін з Расіяй. Ён будзе прадстаўляць Беларусь у кантактах з расійскімі чыноўнікамі і органамі ўрада, а таксама ў органах «Саюзнай дзяржавы» па пытаннях двухбаковага супрацоўніцтва. Селіверстаў можа ўносіць прапановы ў беларускі ўрад, органы дзяржаўнага кіравання, абласныя і гарадскія выканаўчыя камітэты ў пытаннях гандлёва-эканамічнага і інвестыцыйнага супрацоўніцтва з Расіяй.
Акрамя таго, ён будзе каардынаваць дзейнасць беларускіх органаў і іншых падначаленых ураду арганізацый, прадстаўнікоў Беларусі ў органах «Саюзнай дзяржавы», даваць ім абавязковыя для выканання ўказанні і кантраляваць іх выкананне.
Адзначаецца, што Селіверстаў нясе асабістую адказнасць за прасоўванне нацыянальных інтарэсаў Беларусі ў рамках «Саюзнай дзяржавы» і ў дачыненнях з Расіяй.
Чытайце таксама:
Міністр фінансаў Юрый Селіверстаў прызначаны паслом у Расіі
Прызначаны новы міністр фінансаў
Міністр фінансаў расказаў, на што Беларусь просіць грошай у Расіі