Арыштавалі 20‑гадовую Яніну Пазняк, дачку палітзняволенага журналіста Кірылы Пазняка
Беларускія праваабаронцы выдалі заяву аб прызнанні палітзняволенай 20‑гадовай Яніны Пазняк. Гэта дачка арыштаванага ў верасні мінулага года журналіста-палітвязня Кірылы Пазняка, якая, як аказалася, арыштаваная разам з ім.
Яніна Пазняк
4 верасня 2025 года «экстрэмісцкім фармаваннем» абвешчаны YouTube-канал «Платформа 375», а журналіст Кірыла Пазняк, які ў адпаведным рашэнні КДБ названы «арганізатарам» гэтага «фармавання», — затрыманы і змешчаны пад варту па крымінальнай справе (17 верасня 2025 года Кірыла Пазняк прызнаны палітычным зняволеным).
У той жа дзень, 4 верасня, затрыманая і 20‑гадовая дачка Кірылы Пазняка — Яніна Пазняк. Яна таксама змешчаная пад варту, і ёй выстаўлена абвінавачанне ва ўзаемадзеянні з «экстрэмісцкім фармаваннем».