Як змяніўся клімат Беларусі за 40 гадоў?
І зіма, і лета становяцца цяплейшымі.
Фота: LookByMedia
Як змянілася надвор’е ў Беларусі за апошнія дзесяцігоддзі, распавёў начальнік Белгідрамета Сяргей Хільман на «Радыё-Мінск».
«За апошнія 37 гадоў, з 1988 года, сярэднегадавая тэмпература паветра ў краіне павысілася прыкладна на 2 градусы. Штодзённыя назіранні і статыстычныя паказчыкі сярэднясутачнай тэмпературы паказваюць, што на працягу гэтых дзесяцігоддзяў адназначна ідзе пацяпленне.
Халодны перыяд у нас цяплее ў сярэднім на 0,6 градуса за 10 гадоў. Тэмпература летняга перыяду паднімаецца павольней — прыкладна на 0,5 градуса»,
— патлумачыў Хільман.
Наконт прычын пацяплення вядуцца спрэчкі: адны лічаць яго натуральнай з’явай, іншыя вінавацяць ва ўсім антрапагенную дзейнасць чалавека.
«Што тычыцца ападкаў, то мы бачым, што ў змяшанай фазе колькасць ападкаў прыблізна аднолькавая: у летні перыяд дажджы становяцца больш кароткімі, але інтэнсіўнымі».