Politico: Прэм'ер Славакіі быў шакаваны псіхалагічным станам Трампа
Прэм’ер-міністр Славакіі Роберт Фіца пасля сустрэчы з Дональдам Трампам у яго маёнтку Мар-а-Лага ў Фларыдзе 17 студзеня быў шакаваны псіхалагічным станам прэзідэнта ЗША.
Фота: Chip Somodevilla / Getty Images
Пра гэта славацкі палітык распавёў лідарам Еўрапейскага саюза, піша Politico са спасылкай на пяць еўрапейскіх дыпламатаў.
Усе крыніцы заявілі, што не ведаюць падрабязнасцяў, з-за чаго ў Фіца склалася такое меркаванне. Аднак адзін з еўрапейскіх дыпламатаў падкрэсліў, што прэм’ер Славакіі, відавочна, быў «траўмаваны» сустрэчай з Трампам і заявіў, што рэспубліканец «не ў сабе».
У Белым доме інфармацыю пра стан амерыканскага прэзідэнта абверглі.
«Гэта абсалютна фэйкавыя навіны ад ананімных еўрапейскіх дыпламатаў, якія спрабуюць заставацца актуальнымі. Сустрэча ў Мар-а-Лага прайшла пазітыўна і прадуктыўна», — заявіла прадстаўніца Белага дома Анна Келі.