Нямецкі стартап паспяхова правёў выпрабаванні гіпергукавой ракеты. Гэта ўраўнуе Еўропу з Расіяй
Нямецкі стартап з Мюнхена паспяхова правёў выпрабаванні гіпергукавой ракеты — тэхналогіі, якой дагэтуль, як лічылася, валодала толькі Расія.
Такая ракета рухаецца значна хутчэй за кулю, што робіць яе вельмі складанай для перахопу сродкамі супрацьпаветранай і супрацьракетнай абароны. Гэта можа стаць важным крокам наперад для ўзброеных сіл краін Еўропы, піша Bild.
Паводле інфармацыі кампаніі, першы ўдалы запуск гіпергукавога прататыпа адбыўся з нарвежскага касмадрома Андзёя. Ракета развіла хуткасць каля 7300 км/г і змагла пераадолець адлегласць прыкладна 300 кіламетраў.
Прадстаўніца кампаніі Hypersonica з Фельдкірхена адзначыла, што гэта вялікае дасягненне, якое паказвае: у Еўропе за кароткі час можна стварыць высокатэхналагічны прадукт, калі над ім працуе зладжаная каманда. Паводле яе слоў, такія распрацоўкі неабходныя для абароны свабоды і дэмакратыі.
Пры гэтым нагадваецца, што яшчэ ў 1942 годзе нацысцкай Германіі ўдалося выпрабаваць звышгукавую ракету Aggregat 4, аднак яна не была кіраванай і ў выніку не апраўдала чаканняў.
Стартап плануе прадставіць гатовую сістэму ўзбраення да 2029 года. Ужо падчас першага выпрабавання ракета была цалкам манеўранай. Таксама заяўляецца, што кошт новай распрацоўкі прыкладна на 80% ніжэйшы за папярэднія аналагі.
У кампаніі лічаць, што такі падыход дазволіць Еўропе ў межах стратэгій НАТА і Вялікабрытаніі разгарнуць гіпергукавыя магчымасці да 2030 года з істотна меншымі выдаткамі.